Isa 21 | MPS | STEP | Genuai Bidigo Babilon bulu dolaibao wabo po mani. Te genuai sęgę me, dene me, te nai meni yai wa pai bulude pedalaibao, te tǫ te bidi dabe wi elama, pąba pisąma ebo bulude. Agai te polo asaibao, te nai menia pai madi pobegebo wali tiwai bomai wali.

b[Ped 14:8; 18:2]

Isaiah 21

Babilon bulu dolaibao

1 Genuai Bidigo Babilon ^{▼▼21:1Te Hibru pogo te nogi Babilon me elalubeo. Agai te po olama wai, “te wa pai bulu te nambis pąde elalubao,” wai. Tiali goli, te po wali te Babilonde po digi po begelama wali da, homu ebao.} bulu dolaibao wabo
po mani.
Te genuai sęgę me, dene me,
te nai meni yai wa pai bulude pedalaibao,
te tǫ te bidi dabe wi elama, pąba pisąma ebo bulude.
Agai te polo asaibao, te nai menia pai
madi pobegebo wali tiwai bomai wali.
2 Eno te sę te God ena mani na me deli dwaide suali.
Eno Godigo te po wabo odali,
“Te Babilon dabe te ili po olama, geagano bilibo sę eyu,
tama gasa we bidi hani dali dwai sę ebo bage dao.
Tama augwaligo te kolesaga genuai mu
pedalomainu ebo.
Tama tibaso, te Elam ami bidi dabe,
dagego te Babilon buluba hwįagasao.
Tama Midia ami bidi dabe, dagego
te hanu bobegela sagasiąo.
Eno te Babilon dabego gasa
we bidi dabebolo mani sęgę silaibao,” wali.

3 Te nade suali naigo ena wi ilama, didibili ilali.
Tama eno tigide dene genuai me yali,
te we sibigo wai sainu dene ebo tiwai yali.
Eno wi mu elama, eno homu mu doali.
Tama eno magi nai me suyu, me po
me odoyu yabo homu me ebe.
4 Eno tobolu gęǫ elama, tama wigo
eno tigi didibili yali.
Eno te pio giliga iba dega siyu, hulia sagasabode,
eno godolo mu ebo dao.
Tiali goli, te sogo hulide te naigo ena wi mu ilalio.

5 Eno te bidi dabego genuai nai sisi ebo suali.
Tama augwaligo moni ugwa name tǫba mubo suali.
Tama bidi dabe dualama,
nai tuyu, wę tuyu ebo suali.
Tiali goli, deli sogo tama bidi mego
hąį olo e tama po wagasali,
“Te genuai bidi dabe, te boi bidi dabe polo asalio.
Te duga hwįbo awa name polo selama, no muao,” wali.

6 Tama Genuai Bidigo enabolo te po walali,
“Nago bidi me nage tonalumainu tama,
nago dąį ilao, agai tonalumainu.
Tama agai te mena tama nai agai suali
agai nagebolo omainao.
7 Te agai te bidi dabe hos dabede
dualama si si asobo sulama,
me agai te bidi dabe te donkidu,
me kameldu dabe dulasa asobo sulama,
teda agai olo saganama, bugagia mu odama,
mena sę egowe bugagia odaibao.
Tama agai bugagia sumainao,” wali.

8 Tama te tonalubo bidigo laion yowigo
wabo tiwai iyu,
agai te po bomona wali,
“Genuai bidi, ena te boi bidi dabe
tonalubo pesagede tede bidama,
tama ulade me, hulide me,
eno bugagia tonaluai dao.
9 Tama eno te bidi dabe te hosde
dulama si si asobo suali.”
Tama tonalubo bidigo te po wali,
“Babilon polo dolalio, aga polo dolalio.
Tama augwaligo tibo god dabego
piksa dabe tulaluama, tologa palio,” wali.
^b

10 Eno we bidi dabe, hobede ya,
te boi bidi dabego dage
te bidi dabego wit elebo tiwai yalio.
Tiali goli, megi da,
eno te God Tigidali Bomo Elalubo Bidigo mani po
dagebolo pusubao.
Aga te Israel dabego God dao.

Te profet bidigo Idom dabego hanalu wali po wei ponani

11 Te Genuai Bidigo te nai dabe me te
hanu Dumade pedalabo po mani. ^{▼▼21:11Te lain 11 me 13 tede wali po page kuna konebeo. Me badu bidigo homugo te taun Duma te Arebia dabego taun yali bogo homu ebao. Te buku Page Gagalali, Dąį 25:13-15, tede te tiwai wali te nogi Duma te nogi Tema dali elalu, me Kedar dali elalubao, te po te Dąį 21de te ves 14 me 16, tede suao. Tiali goli, te ves 11de te kantri tǫ Idom po olama me walio, tama tiyu, me badu bidigo homugo te vesde wali nogi Duma te tǫ kantri Idom po olama wali dao, te homu ebao.}
Te bulu Idomde bidibo bage augwaligo
i olama, hanaluyu, te po wali,
“Tonalubo bidi, me sogo te hulialubo silaibawe?
Mena sogo mu aga silaibawe?”
12 Tama eno te po wei ponoyu, te po wali,
“Te be da posaiba, tiali goli hulia siyu me yaibao.
Tama dagego ma hanaluabo
homu ebaso da, teda dage ma aselama,
ma hanaluagasiąo,” wali.

Genuai Bidigo Arebia dabe dolaibao

13 Genuai Bidigo te Arebia dolaibao wabo po mani.

Te Dedan dabe dage, te dage biliyu,
nai abelama dobu si eyu ebo bidi dabe dao.
Dage pelama, te Arebia dabego nai
meni yai wa pai buluba duala sigi pabo dao.
14 Te teba wi asali we bidi augwali
wę nogonego mu isibao,
tama tibaso, dagego nai magasao.
Tama te tǫ Tema we bidi dagego
te nai me augwaliba sela piąo.
15 Augwali wi pai dao.
Magi baso meni, te boi bidi dabe hwįbo
bainat hwą me enesigi enego
augwali dali bomo elama, hwįbaso.

16 Genuai Bidigo enabolo e tama po wali, “Te kibu be deli elalubao, te hanu Kedar we bidi dabe dali augwaligo wiegi yai nai dabe dolama silabo. Te kibu be bubuga deli deli sogo eno bugagia nedebao. Tama te kibu bego bubuga dolo mu sia sigi pabo si da, teda eno augwali dali yaibao wali sę dabe eno yaibao. 17 Te Kedar dabe augwali bomai ami bidi dabe augwali enesigi dali hwįbo bugagia mu koneai dao. Tiali goli, augwali dolaibao. Tama dwasianu bidi hani ami dabe naga bidaibao. Ena Genuai Bidi, Israel dabego God, eno po polo wali.”